បាត់ដំបង៖ ជនសង្ស័យគប់កញ្ចក់ឡានអ្នកដំណើរនាពេលយប់ចំនួន៤នាក់ ត្រូវបានកម្លាំងនៃអធិការដ្ឋាននគរបាលស្រុកថ្មគោលបង្ក្រាបឃាត់ខ្លួនបានកាលពីម្សិលមិញ។

អធិការនគរបាលស្រុកថ្មគោល លោកវរសេនីយ៍ទោ សេង លុច បានឱ្យដឹងថា មនុស្សចំនួន៤នាក់នេះមានឈ្មោះ ឡា សុជាតិ ភេទប្រុស អាយុ២០ឆ្នាំ ឈ្មោះ សុវណ្ណ ពេជ្រ ភេទប្រុស អាយុ១៧ឆ្នាំ ឈ្មោះ ជួន សុខសាន្ត ភេទប្រុស អាយុ១៦ឆ្នាំ និង ឈ្មោះ ចាន់ សុជា ភេទប្រុស អាយុ១៩ឆ្នាំ រស់នៅភូមិជ្រោយស្ដៅ ឃុំជ្រោយស្ដៅ ស្រុកថ្មគោល ខេត្តបាត់ដំបង ពួកគេទាំង៤តែងតែធ្វើសកម្មភាពគប់កញ្ចក់ឡានអ្នកដំណើរ ជាពិសេសឡានធុនធំដែលធ្វើដំណើរកាត់ភូមិរបស់គេនាពេលយប់។

បើតាមលោក សេង លុច ជនបង្កបានសារភាពថាពួកគេពិតជាបានគប់កញ្ចក់រថយន្តពិតប្រាកដមែនដោយសាររថយន្តទាំងនោះបើកភ្លើងហ្វារចាំងភ្នែកពួកគេ។

បច្ចុប្បន្នជនសង្ស័យត្រូវបានឃាត់ខ្លួននៅអធិការដ្ឋាននគរបាលស្រុកថ្មគោលដើម្បីបញ្ជូនសំណុំរឿងបញ្ជូនទៅតុលាការ៕